ಮಲ್ಯರ ಕಿಂಗ್‌ಫಿಷರ್ ವಿಮಾನದಲ್ಲಿದ್ದುದು ಗುಂಡು!

(ಬೊಗಳೂರು ಸಂಚೋದನಾ ಬ್ಯುರೋದಿಂದ)

ಬೊಗಳೂರು, ಮಾ.24- ಕಿಂಗ್ ಫಿಷರ್ ವಿಮಾನದಲ್ಲಿ ಸ್ಫೋಟಕ ಪತ್ತೆಯಾಗಿರುವ ಪ್ರಕರಣದ ಹಿಂದೆ ಬಿದ್ದಿರುವ ಬೊಗಳೆ ರಗಳೆ ಏಕಸದಸ್ಯ ಬ್ಯುರೋದ ಸಮಸ್ತ ಸಿಬ್ಬಂದಿ ಗಡಣವು ಕೊನೆಗೂ ಅದರೊಳಗಿದ್ದುದು ಗುಂಡು ಎಂಬುದನ್ನು ಪತ್ತೆ ಹಚ್ಚಿದ್ದಾರೆ.

ಬೃಹತ್ ಬೊಗಳೂರು ಚುನಾವಣೆ ನಡೆಯುತ್ತಿರುವ ಹಿನ್ನೆಲೆಯಲ್ಲಿ ಬೊಗಳೂರಿನಲ್ಲಿ ಕಂಡಲ್ಲಿ ಗುಂಡು ಹಾಕುವ ನಿಟ್ಟಿನಲ್ಲಿ ಕಿಂಗ್ ಫಿಷರ್ ಸಂಸ್ಥೆಯೇ ಈ ಗುಂಡುಗಳನ್ನು ತಿರುವನಂತಪುರದ ಗೇರು ತೋಟಗಳಿಂದ ತರಿಸುತ್ತಿತ್ತು ಎಂಬುದನ್ನು ಸಂಚೋದಿಸಲಾಗಿದೆ.

ಒಳಗೆ ಸೇರಿದರೆ ಗುಂಡು, ಹುಡುಗಿ ಆಗುವಳು ಗಂಡು ಎಂಬ ಹಾಡಿನಿಂದ ಪ್ರೇರಿತರಾಗಿರುವ ಮದಿರೆಯ ದೊರೆ ಮಲ್ಯರ ಕಿಂಗ್ ಫಿಷರ್ ಸಂಸ್ಥೆಯು, ಗುಂಡುಗಳನ್ನೇ ತರಿಸಿದರೆ ಚುನಾವಣೆ ಸಂದರ್ಭ ವಿಭಿನ್ನ ರಾಜಕೀಯ ಪಕ್ಷಗಳಿಗೆ ಹಂಚಲು ನೆರವಾಗಬಹುದು ಎಂದು ಲೆಕ್ಕಾಚಾರ ಹಾಕಿಯೇ ಇದನ್ನು ತರಿಸಿತ್ತು.

ಈ ಗುಂಡನ್ನು ಸ್ಫೋಟಕ ಎಂದು ಕರೆದಿರುವುದರಲ್ಲಿ ಯಾವುದೇ ತಪ್ಪಿಲ್ಲ ಎಂದೂ ಸಮರ್ಥಿಸಿಕೊಂಡಿರುವ ಸಂಸ್ಥೆಯು, ಒಳಗೆ ಸೇರಿದರೆ ಖಂಡಿತವಾಗಿಯೂ ಇದು ಸ್ಫೋಟಕ ಫಲಿತಾಂಶವನ್ನು ನೀಡುತ್ತದೆ. ಗೆಲ್ಲಬೇಕಾದ ಅಭ್ಯರ್ಥಿ ಸೋಲುವ, ಸೋಲಬೇಕಾದ ಅಭ್ಯರ್ಥಿ ಗೆಲ್ಲುವ ಸ್ಫೋಟಕ ಫಲಿತಾಂಶಗಳನ್ನು ಅದು ತಂದೊಡ್ಡುತ್ತದೆ ಎಂದು ಅವರು ಸಮರ್ಥಿಸಿಕೊಂಡಿದ್ದಾರೆ.