ಅಂಗಿ ಹಾಕಿದರೆ ಸುದ್ದಿ, ಕಳಚಿದರೆ ರದ್ದಿ!

(ಬೊಗಳೂರು ಬಟ್ಟೆರಹಿತ ಬ್ಯುರೋದಿಂದ)

ಬೊಗಳೂರು, ಮಾ.6- ಥೂ... ಯಾರಿಗೆ ಯಾವಾಗ ಎಂಥ ವರದಿಗಳನ್ನು ನೀಡಬೇಕೆಂಬುದು ಗೊತ್ತೇ ಆಗುತ್ತಿಲ್ಲವಲ್ಲ ಎಂಬುದು ಬೊಗಳೆ ಸೊಂಪಾದಕರುಗಳ ಉದ್ಗಾರ.

ಇದಕ್ಕೆ ಕಾರಣವೆಂದರೆ, ಸಾಲಮನ್ನಾ ಖಾನ್ ಅಂಗಿ ಕಳಚಿದ್ದನ್ನೇ ಸುದ್ದಿ ಮಾಡುವವರು ಮಾಧ್ಯಮಕ್ಕೆ ಅಪಚಾರ ಎಸಗಿದಂತೆ ಎಂಬುದು ಅವರ ಅಭಿಪ್ರಾಯ. ಇದೇಕೆ ತಮ್ಮಷ್ಟಕ್ಕೆ ತಾವೇ ಒದರಿಕೊಳ್ಳುತ್ತಿದ್ದೀರಿ? ಸಾಲಮನ್ನಾ ಖಾನನಿಗೆ ಏನಾದರೂ ಹಾಟ್ ಹಾಟ್ ತಾರೆಯರ ಕಾಟದಿಂದ ಸೆಖೆ ಜಾಸ್ತಿಯಾಗಿರಬೇಕು, ಅದಕ್ಕಾಗಿ ಅಂಗಿ ಕಳಚಿ ತಂಪು ಮಾಡಿಕೊಳ್ಳುತ್ತಿದ್ದಿರಬಹುದಲ್ಲ ಎಂದು ವರದ್ದಿಗಾರರು ಪ್ರಶ್ನಿಸಿದಾಗ, ಅದಕ್ಕೆ ಅವರು ಉದಾಹರಣೆ ಸಹಿತ ಉತ್ತರ ನೀಡಿ ನಮ್ಮನ್ನು ತತ್ತರಿಸುವಂತೆ ಮಾಡುತ್ತಾ ಐಸ್ ವಾಟರ್ ತರಿಸಿಕೊಂಡರು.

ಸಾಲಮನ್ನಾ ಖಾನ್ ಅಂಗಿ ಹಾಕಿದರೆ ಅದನ್ನು ಸುದ್ದಿ ಮಾಡಬೇಕು. ಅಂಗಿ ಕಳಚುವುದು ಮಾಮೂಲಿ ಸಂಗತಿಯೇ ಅಲ್ಲವೇ? ಎಂದು ಪ್ರಶ್ನಿಸಿರುವ ಅವರು, ಇದನ್ನೇಕೆ ಸುದ್ದಿ ಮಾಡಬೇಕು? ಈಗಾಗಲೇ ಜಾಗತಿಕ ತಾಪಮಾನ ಹೆಚ್ಚಾಗಿದ್ದು, ಎಲ್ಲರೂ ಸೆಕೆಯಲ್ಲಿದ್ದಾರೆ. ಶರ್ಟು ಕಳಚುತ್ತಾರೆ. ಅಂತೆಯೇ ಸಾಲಮನ್ನಾ ಖಾನ ಅವರು (ಬಟ್ಟೆಗೂ) ಕತ್ರೀನಾ? ಜತೆಗೆ ತಿರುಗಾಡಿಕೊಂಡು ಸುದ್ದಿ ಮಾಡುತ್ತಿದ್ದಾರೆ. ಆಗಾಗ್ಗೆ ತನ್ನ ಅಂಗಿ ಬದಲಾಯಿಸಿದಂತೆಯೇ ತಮ್ಮ ಲವರ್‌ಗಳನ್ನೂ ಬದಲಾಯಿಸುತ್ತಾ ಇರುತ್ತಾರೆ. ಇದನ್ನೆಲ್ಲಾ ಸುದ್ದಿ ಮಾಡುವುದು ಬಿಟ್ಟು, ಹುಟ್ಟುಡುಗೆಯಲ್ಲಿ ಇರೋದನ್ನೇ ಸುದ್ದಿ ಮಾಡಿದರೆ ನಮ್ಮಂಥ ಅವಮರ್ಯಾದಸ್ಥ ಪತ್ರಿಕೆಗಳಿಗೆ ಮತ್ತಷ್ಟು ಅವಮಾನ ಮಾಡಿದಂತಾಗುತ್ತದೆ ಎಂದು ಅಲವತ್ತುಕೊಂಡಿರುವುದನ್ನು ನಮ್ಮ ರದ್ದಿಗಾರರು ವರದಿ ಮಾಡಿಲ್ಲ.