ಕಿರಿ- ಕೆಟ್ ತಂಡ ಖರೀದಿಯಲ್ಲಿ ಸೋತು ಸುಣ್ಣವಾದ 'ಬಿಡ್ಡ'ರು

(ಬೊಗಳೂರು ಕ್ರಿಕೆಟ್ಟಾಟ ಫಿಕ್ಸಿಂಗ್ ಬ್ಯುರೋದಿಂದ)

ಬೊಗಳೂರು, ಜ.25- ಜಗತ್ತಿನ ಅತ್ಯಂತ ಶ್ರೀಮಂತ ಕ್ರಿಕೆಟ್ ಸಂಸ್ಥೆ ಬಿಸಿಬಿಸಿಕೈಯ ಐ(ಪಿ)ಲ್‌ನಲ್ಲಿ ತಂಡಗಳ ಖರೀದಿ ಭರದಿಂದ ಸಾಗಿದ್ದು, ಬೊಗಳೂರು ತಂಡವನ್ನು ಖರೀದಿಸುವಷ್ಟು ಯಾರೂ ಶ್ರೀಮಂತರರಿರಲಿಲ್ಲ ಎಂಬುದು ಭಾರಿ ಅಚ್ಚರಿಗೆ ಕಾರಣವಾಗಿದೆ.

ರಿ-ಲಯನ್ಸ್ ಅಧ್ಯಕ್ಷ ಅನಿಲ ಅಂಬಾಭವಾನಿ ಅವರು ಮುಂಬಯಿ ತಂಡವನ್ನು ಅತ್ಯಧಿಕ ಹಣ ನೀಡಿ, ಶಾರ್ಕ್ ಖಾನ್ ಅವರು ಕಾಲುಕುತ್ತ ತಂಡವನ್ನು, ಖೋಡೇಸ್ ಯುಬಿ ಮಲ್ಯರು ಬೆಂಗಳೂರು ತಂಡವನ್ನು ಖರೀದಿಸುವಷ್ಟು ಶ್ರೀಮಂತರಾಗಿದ್ದಾರೆ. ಆದರೆ ಬೊಗಳೂರು ತಂಡವನ್ನು ಖರೀದಿಸುವ ಹಣ ತಮ್ಮಲ್ಲಿಲ್ಲ ಎಂದು ಅವರೆಲ್ಲಾ ಕೈ ಚೆಲ್ಲಿ ಕೂತಿದ್ದಾರೆ.

ಬೊಗಳೂರಿನ ಬೊಗಳೆ ತಂಡವನ್ನು ಖರೀದಿಸಬೇಕಿದ್ದರೆ ಹೊಸದಾಗಿ ನೋಟು/ನಾಣ್ಯ ಮುದ್ರಿಸಬೇಕಾಗುತ್ತದೆ. ಯಾಕೆಂದರೆ ಅಷ್ಟು ಮೌಲ್ಯದ ಹಣ ಎಷ್ಟು ಶ್ರಮಪಟ್ಟರೂ ದೊರೆಯಲಾರದು. ಅಷ್ಟೊಂದು ಅಮೂಲ್ಯವಾದ ತಂಡಕ್ಕೆ ಜೈ ಎನ್ನುತ್ತಾ ಅವರೆಲ್ಲಾ ಬೈಬೈ ಹೇಳಿದ್ದಾರೆ.

ಈ ಬಗ್ಗೆ ಬೇರೆ ಯಾವುದೇ ಪತ್ರಿಕೆಗಳವರು ಸ್ಟಿಂಗ್ ತನಿಖೆಗೆ ಹೊರಡದ ಕಾರಣ ಬೊಗಳೂರು ಬ್ಯುರೋದ ತಂಡವನ್ನೇ ಕಳುಹಿಸಲಾಯಿತು. ಈ ಏಕಸದಸ್ಯ ಬ್ಯುರೋದ ಸಕಲ ಸದಸ್ಯರೂ ಸೇರಿಕೊಂಡು ಪತ್ತೆ ಮಾಡಿದ ಅಂಶದ ಪ್ರಕಾರ, ಬೊಗಳೂರು ತಂಡವನ್ನು ಖರೀದಿಸಲು ಬೇಕಾದ ಹಣ ಜಗತ್ತಿನ ಯಾವುದೇ ಶ್ರೀಮಂತನ ಬಳಿ ಇರುವುದಿಲ್ಲ ಎಂಬ ವಾದ ಖಚಿತವಾಯಿತು. ಯಾಕೆಂದರೆ ಸೊನ್ನೆ ಡಾಲರ್ ಆಗಲಿ, ಸೊನ್ನೆ ರೂಪಾಯಿಯಾಗಲಿ... ಈ ಸೊನ್ನೆ ಎಂಬ ಮೊತ್ತದ ನೋಟು ಎಲ್ಲೂ ದೊರೆಯುತ್ತಿಲ್ಲ ಎಂಬುದು ಎಲ್ಲರಿಗೂ ತಿಳಿದ ಸಂಗತಿ. ಆದರೆ ಬಿಡ್ಡುದಾರರು ಸೊನ್ನೆಗಿಂತಲೂ ಕಡಿಮೆ ರೂಪಾಯಿಗೆ ತಮ್ಮ ಬಿಡ್ ಸಲ್ಲಿಸಿದ್ದೇ, ಬೊಗಳೂರು ತಂಡವನ್ನು ಯಾರು ಕೂಡ ಖರೀದಿಸದಿರಲು ಕಾರಣ ಎಂಬುದು ಪತ್ತೆಯಾಗಿದೆ.

ಪಕ್ಕದಲ್ಲೇ ಬಿದ್ದಿದ್ದ ಇನ್ನೊಂದು ಮಾಹಿತಿ ಪ್ರಕಾರ, ಸೊನ್ನೆಗಿಂತ ಕಡಿಮೆ ಬೆಲೆಯಲ್ಲಿ ಖರೀದಿಸುವುದು ಸೂಕ್ತವಲ್ಲ ಎಂದು ಈ ಜಗತ್ತಿನ ಶ್ರೇಷ್ಠಾತಿಶ್ರೇಷ್ಠ ಶ್ರೀಮಂತ ಕುಳಗಳು ತೀರ್ಮಾನಿಸಿರುವುದು ಕೂಡ ಬೊಗಳೂರು ತಂಡ ಖರೀದಿಯಾಗದಿರುವುದಕ್ಕೆ ಕಾರಣ.

ಹಾಗಾಗಿ ಬೊಗಳೂರು "ಸು"ರಕ್ಷಿತವಾಗಿದೆ, ಭದ್ರವಾಗಿ ನೆಲೆ ನಿಂತಿದೆ ಮತ್ತು ಬೊಗಳೂರನ್ನು ಯಾರೂ ಏನೂ ಮಾಡಲಾರರು ಎಂಬುದು ತನಿಖೆಯ ವೇಳೆ ಶ್ರುತಪಟ್ಟಿದೆ.