ವಯಸ್ಕರ ಶಿಕ್ಷಣದಿಂದ ರಾಕ್ಷಸರಾಗಲು ಹೊರಟರು!

(ಬೊಗಳೂರು ರಾಕ್ಷಸತಾ ಬ್ಯುರೋದಿಂದ)

 

[ಶಿಕ್ಷಕರ ದಿನಾಚರಣೆ ಪ್ರಯುಕ್ತ ಶಿಕ್ಷೆ ನೀಡುವವರ ಕುರಿತ ವಿಶೇಷ ವರದಿ]

ಬೊಗಳೂರು, ಸೆ.5- ನಾವೂ ಅಕ್ಷರ ಕಲಿತು 'ವಯಸ್ಕರ' ಶಿಕ್ಷಣ ಪಡೆದು ಈ ಸಮಾಜದಲ್ಲಿ ರಾಕ್ಷಸರಾಗೋಣ... ಅಲ್ಲಲ್ಲ.... ಸಾಕ್ಷರರಾಗೋಣ, ಗೌರವ ಗಳಿಸಿಕೊಳ್ಳೋಣ ಎಂದು ಹೊರಟರೆ ಇವರೆಲ್ಲಾ ನಮ್ಮನ್ನು ದೂರ ತಳ್ಳುವ ಸಂಚು ರೂಪಿಸುತ್ತಿದ್ದಾರೆ ಎಂಬುದು ಬಿಹಾರದಲ್ಲಿ ಪೊಲೀಸರ ಅಳಲು.

 

ಚಿಕ್ಕವರಿರುವಾಗ ಅಪ್ಪ ಅಮ್ಮ ಕಷ್ಟಪಟ್ಟು ನಾಲ್ಕಕ್ಷರ ಕಲಿಯಲಿ ಎಂಬ ಕಾರಣ ನೀಡಿ ನಮ್ಮನ್ನು ಶಾಲೆಗೆ ಕಳುಹಿಸುತ್ತಿದ್ದರು. ಆದರೆ ಚಿಕ್ಕವರಿರುವುದೇ ಆಟವಾಡುವುದಕ್ಕೆ, ದೊಡ್ಡವರಾದ ಮೇಲೆ ಆಡಲಾಗುತ್ತದೆಯೇ ಎಂಬುದು ನಮಗೆ ಅಂದಿನ ಕಾಲದಲ್ಲೇ ಹೊಳೆಹೊಳೆದಿರುವುದರಿಂದ ನಾವು ಚಿನ್ನಿದಾಂಡು (ಕುಟ್ಟಿ-ದೊಣ್ಣೆ), ಬುಗರಿ, ಗೋಲಿ, ಕಾಲೆಳೆಯುವಿಕೆ ಮುಂತಾದ ಆಟದಲ್ಲಿ ಪರಿಣತಿ ಪಡೆದಿದ್ದೆವು.

 

- ಇದು ಅಸತ್ಯಾನ್ವೇಷಿಯ ಏಕೈಕ ಸದಸ್ಯರ ತನಿಖಾ 'ತಂಡ'ವು ಇಲ್ಲಿ ಪ್ರಕಟವಾಗಿರುವ ಸುದ್ದಿಯಿಂದ 'ಥಂಡಾ' ಹೊಡೆದು ಬೆಚ್ಚಿಬಿದ್ದು ಅಡ್ಡಾದಿಡ್ಡಿ ಚಲಿಸದೆ ನೇರವಾಗಿ ಬಿಹಾರಕ್ಕೆ ಧಾವಿಸಿ ಪೊಲೀಸರನ್ನೇ ವಿಚಾರಣೆಗೆ ಗುರಿಪಡಿಸಿದಾಗ ಕಂಡುಕೊಂಡ ಅಸತ್ಯ.

 

ಅಲ್ಲಾ ಸ್ವಾಮಿ, ಕಾಲ ಕಳೆದಂತೆ ಈ ಮಹಾನ್ ಕ್ರೀಡೆಗಳನ್ನು ದೇಶದ ಕ್ರೀಡೆಗಳ ಪಟ್ಟಿಯಿಂದಲೇ ಕಾಲಕಸ ಮಾಡಿ ತಳ್ಳಿ ಹಾಕುತ್ತಾರೆ ಅಂತ ನಮಗೇನು ಕನಸು ಬಿದ್ದಿತ್ತೇ? ಗೊತ್ತಿದ್ದರೆ ಸುಮ್ಮನೇ ನಾವು ಶಾಲೆಗೆ ಹೋಗಿ ಮಾಸ್ಟರರ ಕೈಲಿ ಪೆಟ್ಟು ತಿಂದರೂ ಅಕ್ಷರ ಕಲಿಯುತ್ತಿರಲಿಲ್ಲವೇ ಎಂದು ಹಳೆಯ ನೆನಪುಗಳನ್ನು ಮೆಲುಕು ಹಾಕುತ್ತಾ ಬಿಚ್ಚಿಟ್ಟವರು ಬಿಹಾರದ ಪೊಲೀಸರ ಒಂದು ಗುಂಪು.

 

ಆದರೂ ಓಟ, ಕಾಲೆಳೆದಾಟ, ಲಂಚ ನೀಡುವಿಕೆಯ ಕಸರತ್ತು, ರಾಜಕಾರಣಿಗಳ ಪ್ರಭಾವ ಮುಂತಾದ ಸಣ್ಣ ಪುಟ್ಟ ಆಟಗಳನ್ನು ಚಿಕ್ಕಂದಿನಿಂದಲೇ ಕರಗತ ಮಾಡಿಕೊಂಡ ಆಟಗಳಿಂದಾಗಿ ನಮಗೆ, ನಮ್ಮ ಕುಟುಂಬಿಕರಿಗೆ ಮೇಯಲು ಒಂದು ಕೆಲಸ ಅಂತ ಸಿಕ್ಕಿದೆ. ಈ ಕೆಲಸದಿಂದಾಗಿಯೇ ನಾವು ಬಾಚಿ ಬಾಚಿಕೊಳ್ಳುತ್ತಿದ್ದೇವೆ. ಆದರೆ ನಮಗೀಗ ಅದೆಲ್ಲಿತ್ತೋ... ಆ-ಜ್ಞಾನ... ಅದೀಗ ಉದಯವಾಗುತ್ತಿದೆ. ಈಗಾಗಲೇ ರಾಕ್ಷಸರಾಗಿರುವ ನಾವು, ವಯಸ್ಕರ ಶಿಕ್ಷಣ ಪಡೆದು ಸಾಕ್ಷರರಾಗೋಣ ಅಂತ ಮನಸ್ಸು ಮಾಡಿದ್ದೇವೆ. ಅದಕ್ಕಾಗಿ ಶಾಲೆಯಿಂದ ಮಕ್ಕಳನ್ನು ಹೊರಗೆ ಹಾಕಿ ನಾವು ಓದು ಬರಹ ಕಲಿಯಲು ನಿರ್ಧರಿಸಿದ್ದೇವೆ ಎಂದು ಅವರು ತಮ್ಮ ನಿರ್ಧಾರವನ್ನು ಸಮರ್ಥಿಸಿಕೊಂಡರು.

 

ಆ ಮಕ್ಕಳಿಗೇನು, ಇನ್ನೂ ಸಾಕಷ್ಟು ಅಂದರೆ 50-60 ವರ್ಷ ಇದೆ, ಆ ಅವಧಿಯಲ್ಲಿ ಕಲಿತುಕೊಳ್ಳುತ್ತಾರೆ ಎಂದು ಹೇಳಿರುವ ಪೊಲೀಸರು, ನಾವೇನೂ ಅವರನ್ನು ಹೊರಹೊಕಲಿಲ್ಲ, ನಮ್ಮ ನಮ್ಮ ಬಂದೂಕು ನಮ್ಮಷ್ಟಕ್ಕೇ ತೋರಿಸ್ತಾ ಇದ್ದೆವು, ಜೋರಾಗಿ ನಮ್ಮ ನಮ್ಮೊಳಗೇ ಕೂಗಾಡುತ್ತಿದ್ದೆವು, ನಿದ್ದೆ ಬಂದಾಗ ಗಟ್ಟಿಯಾಗಿ ಬಾಗಿಲು ಹಾಕಿ ನಿದ್ದೆ ಮಾಡುತ್ತಿದ್ದೆವು... ಹಾಗಾಗಿ ಈ ಮಕ್ಕಳೇ ಒಳಗೆ ಬರಲಿಲ್ಲ... ಎಂದು ಒತ್ತಿ ಒತ್ತಿ ಸಮರ್ಥನೆ ಮಾಡಿಕೊಂಡರು. ಮಾತ್ರವಲ್ಲ, ನಾವಿಲ್ಲಿ ಎಷ್ಟೊಂದು ಶಾಂತಿಯಿಂದ ನಿದ್ದೆ ಮಾಡುತ್ತೇವೆ ಎಂದೂ ಕೇಕೆ ಹಾಕಿದರು!

 

ಮತ್ತೊಬ್ಬ ಪೊಲೀಸ್ ಪೇದೆ ಸ್ವಲ್ಪ ಸ್ವಲ್ಪವೇ ತೂರಾಡುತ್ತಿದ್ದ. ಸತ್ಯವಾಗಿಯೂ ಆತ ಪೂರ್ತಿ ತೂರಾಡುತ್ತಿರಲಿಲ್ಲ ಎಂದು ಬ್ಯುರೋ ಸ್ಪಷ್ಟಪಡಿಸುತ್ತದೆ. ಆತನನ್ನು ವಿಚಾರಿಸಿದಾಗ ಆತನ ನಿರೀಕ್ಷೆಯೇ ಮುಗಿಲು ಮುಟ್ಟುವಂತಿತ್ತು..... ಆತ ಅರೆಬರೆ ಪ್ರಜ್ಞೆಯಲ್ಲಿ ಹೇಳಿದ್ದೇನು? "ಸ್ವಾಮೀ, ಇಲ್ಲಿ ಪ್ರವೇಶ ಇರುವುದು ವಯಸ್ಕರಿಗೆ ಮಾತ್ರ.... ಅದಕ್ಕೇ ಭಾರೀ ನಿರೀಕ್ಷೆಯಲ್ಲಿದ್ದೇನೆ"!!!