ಮಗಳನ್ನು ಪೋಷಿಸುವುದು ಮಾವನ ಕರ್ತವ್ಯ!

(ಬೊಗಳೂರು ಮ-ರಗಳೆ ಬ್ಯುರೋದಿಂದ)

ಬೊಗಳೂರು, ಆ.3- ಫಲ ಕೊಡುವ ಮಗಳನ್ನು ಬೆಳೆಸಿ ಪೋಷಿಸುವುದು ಮಾವನಾದವನ ಕರ್ತವ್ಯ.

ಈ ವಾಕ್ಯ ನೋಡಿ ಆಶ್ಚರ್ಯವಾದ ಹಿನ್ನೆಲೆಯಲ್ಲಿ ಮಾವನೇಕೆ ಮಗಳನ್ನು ಬೆಳೆಸಬೇಕು ಎಂದು ಕೇಳಿದಾಗ, ಉಸಿರು ಬಿಡಬೇಕಿದ್ದರೆ, ಜೀವನ ಹಸಿರಾಗಬೇಕಿದ್ದರೆ ಮಗಳು ಬೇಕು ಎಂಬ ಗೊಂದಲದ ಉತ್ತರವೇ ಸಿಕ್ಕಿತ್ತು. ಅಂತೂ ಬ್ಯುರೋದ ಮ-ರಗಳೆ ಗೊಂದಲದ ಗೂಡಾಗಿ ಪರಿವರ್ತಿತವಾಯಿತು.

ಗಿಡ ನೆಡಬಹುದು, ಮರಗಳನ್ನೇ ನೆಡುವುದು ಹೇಗಪ್ಪಾ.... ಎಂದು ರಪರಪನೆ ತಲೆ ಕೆರೆದುಕೊಂಡಾಗ ಈ ಸಂದೇಹಕ್ಕೆ ಪರಿಹಾರ ಸಿಕ್ಕಿದ್ದು ಇಲ್ಲಿ ಪ್ರಕಟವಾಗಿರುವ ಸುದ್ದಿಯಿಂದ.

ಒಂದಿಡೀ ಮರವನ್ನೇ ಕಡಿದು.... ಅಲ್ಲಲ್ಲ... ಬೇರು ಸಮೇತ ಕಿತ್ತು ಬೇರೆಡೆ ನೆಟ್ಟು ಸುಲಲಿತವಾಗಿ ಸ್ಥಳಾಂತರ ಮಾಡಲಾಗಿದೆ!

ಈ ವಿಷಯಕ್ಕೆ ಅರ್ಧದಲ್ಲೇ, ಸೆಮಿ ಕೋಲನ್ ಹಾಕೋಣ.....

ಈಗ ಈ ಸ್ಲೋಗನ್ ಹಿಂದೆ ಅನ್ವೇಷಣೆಗೆ ಹೊರಟಾಗ ಇದು ಸ್ವರಲೋಪ.... ಅಲ್ಲಲ್ಲ ವ್ಯಂಜನ ಲೋಪ ಸಂಧಿ ಎಂಬುದು ಗೊತ್ತಾಯಿತು.

ಮಗಳನ್ನು ಎನ್ನುವ ಕಡೆ ಮಧ್ಯದಲ್ಲಿ ಒಂದು 'ರ' ಹಾಗೂ ಮಾವನಾದವನ ಎಂಬುದರ ಮಧ್ಯದಲ್ಲಿ 'ನ' ಎಂಬುದು ವೈಯಾಕರಣಿಗಳ ಯಾವುದೋ ಒಂದು ಲೋಪ ಸಂಧಿಗೆ ಸೇರಿಕೊಂಡಿರುವ ಕಾರಣದಿಂದಾಗಿ ಇದು ಒಂದು ಕಾಲದಲ್ಲಿ ಪರಿಸರ ಸಂರಕ್ಷಕರ ಸ್ಲೋಗನ್ ಆಗಿದ್ದಿರಬಹುದು ಎಂಬುದು ಬ್ಯುರೋಗೆ ಆಮೇಲೆ ತಿಳಿದುಬಂದ ವಿಷಯ.

ಈಗ ಸೆಮಿ ಕೋಲನ್‌ನಿಂದ ಮುಂದುವರಿಸಲಾಗಿ....

ಮೇಲಿನ ಸ್ಲೋಗನ್‌ಗೂ ಈ ಪ್ರಕರಣಕ್ಕೂ ಸಾಕಷ್ಟು ಸಂಬಂಧವಿದೆ ಎಂಬುದು ಬೊಗಳೆರಗಳೆ ಬ್ಯುರೋ ತನಿಖೆಯಿಂದ ಗೊತ್ತಾಗಿದೆ.ಈ ಮರ ನೆಟ್ಟ ನಾರಾಯಣಸ್ವಾಮಿ ಎಂಬವರು ಈ ಸ್ಲೋಗನ್ನನ್ನು ಅಕ್ಷರಶಃ ಪಾಲಿಸಿದ್ದಾರೆ. ಮಗಳನ್ನು ಬೇರೆಯವರಿಗೆ ಕೊಟ್ಟು ಮದುವೆ ಮಾಡಿದ ಸ್ಮರಣಾರ್ಥ ಅವರು ಈ ಸಸಿ ನೆಟ್ಟಿದ್ದರು. ಅದೀಗ ಫಲಕೊಡುವ ಮರವಾಗಿದೆ. ಮಾವ ಮಗಳನ್ನೂ ಕೊಟ್ಟಾಗಿದೆ, ಮರಗಳನ್ನೂ ಬೆಳೆಸಿಯಾಗಿದೆ ! ಮಗಳನ್ನು ಮನೆಯಿಂದ ಹೊರ ಹಾಕಿ ಆಗಿದೆ, ಮರವನ್ನೂ ಮನೆಯಿಂದ ದೂರ ಇಟ್ಟೂ ಆಗಿದೆ!!