ಓದುಗರಿಗೊಂದು ಸವಿನಯ ಧಮಕಿ
"ತಾಂತ್ರಿಕ ಕಾರಣ"ಗಳಿಂದಾಗಿ ನಮ್ಮ ಇ-ಕಸದ ಬುಟ್ಟಿಯ ಏ.11ರ ಸಂಚಿಕೆಯಲ್ಲಿ ಪ್ರಕಟವಾದ "ಮಾನವರಿಗೆ ಹೋಲಿಸಿ ಗಾರ್ದಭ ಕುಲಕ್ಕೆ ಅವಮಾನ: ಕತ್ತೆಗಳ ತೀವ್ರ ಪ್ರತಿಭಟನೆ" ವರದಿ ಪುಟಕ್ಕೆ ಅಂಟಿಕೊಳ್ಳಲು ಕೇಳುತ್ತಲೇ ಇಲ್ಲ. ಈ ಕತ್ತೆ ಸುದ್ದಿಯನ್ನು ಎಷ್ಟು ಬಾರಿ ತಂದು ಎಳೆದು ಪುಟದ ಗೂಟಕ್ಕೆ ಕಟ್ಟಿ ಹಾಕಿದರೂ ಆಗೊಮ್ಮೆ-ಈಗೊಮ್ಮೆ ಇಣುಕಿ, ಮತ್ತೆ ಸ್ವಯಂಚಾಲಿತವಾಗಿ ನಾಪತ್ತೆಯಾಗುತ್ತಿದ್ದ ಕಾರಣ, ಹತಾಶ ಅಭಿಮಾನಿಗಳು ಕಸದ ಬುಟ್ಟಿ ತುಂಬಾ ಕಸ ಎಸೆದು ಪ್ರತಿಭಟನೆ ವ್ಯಕ್ತಪಡಿಸಿದ್ದಾರೆ.

ಈ ಕಾರಣಕ್ಕೆ ಗಾರ್ದಭ ರಾಜ್ ಅವರು ಕೂಡ "ನಮ್ಮ ವರದಿ ನಿಮ್ಮಲ್ಲಿ ಪ್ರಕಟವಾಗಲೇ ಇಲ್ಲ, ನಮ್ಮನ್ನೇನು ನಿಮ್ಮಷ್ಟು ಮೂರ್ಖರೆಂದು ತಿಳಿದಿದ್ದೀರೆ" ಎಂದು ಆಕ್ಷೇಪಿಸಿದ್ದಾರೆ. ಈ ಸುದ್ದಿ ಪ್ರಕಟವಾಗದ ಕಾರಣಕ್ಕೆ ಓದುಗರಿಗೆ ಆದ ಅನುಕೂಲಕ್ಕೆ ನಾವು ಸಂತಾಪ ಸೂಚಿಸುತ್ತೇವೆ.ಕತ್ತೆ ಪುರಾಣ ಯಾಕೆ ಆಗುತ್ತೆ ನಾಪತ್ತೆ ಅಂತ ಶೋಧಿಸಲು ನಮ್ಮ ಅಸತ್ಯಾನ್ವೇಷಣ ತಂಡ ಹೊರಟಿದೆ. ಎರಡೆರಡು ಬಾರಿ ಬ್ಲಾಗ್ ನಲ್ಲಿ ತುರುಕಿದರೂ ಈ ಕತ್ತೆ ಚಿತ್ರ ಸಮೇತ ನಾಪತ್ತೆಯಾಗುವುದು ನಮಗೆ ನಮ್ಮ ಪ್ರತಿಸ್ಪರ್ಧಿಗಳ ಕೈವಾಡವಿದೆಯೋ ಎಂಬ ಶಂಕೆಗೆ ಕಾರಣವಾಗಿದೆ. ಆ ಕತ್ತೆಯನ್ನು ಮತ್ತೆ ಹಿಡಿದು ತರುತ್ತೇನೆ ಎಂದು ಆಶ್ವಾಸನೆ ನೀಡುತ್ತಿದ್ದೇನೆ. ಅಲ್ಲಿವರೆಗೆ ನೀವು ಮೇಲಿನ ವರದಿಯ ಲಿಂಕ್ ಕ್ಲಿಕ್ಕಿಸಿದರೆ ಕತ್ತೆ ಪತ್ತೆ ಆಗುತ್ತೆ. ಗುಡ್ ಲಕ್.
-ಸಂಪಾದಕ